Presidenti, Ilir Meta nëpërmjet nje postimi në rrjetin social facebook ka replikuar sërisht për çështjen e patronazhistëve, të cilët kanë qenë në vëmendjen e opinionit publik ditët e fundit. Meta akuzon Partinë Socialiste për rritjen e numrit të të punësuarve në administratë publike. Sipas tij janë 10 mijë persona më shumë të punësuar në administratë publike, krahasuar me një vit më parë dhe kjo është cilësuar nga Meta si ndërhyrje flagrante në procesin zgjedhor. Meta shprehet se këto vende pune i kanë përfituar pikërisht patronazhistët e Partisë Socialiste në këmbim të punës që kanë ofruar. “Këto vende pune, të cilat nuk kanë asnjë ndikim në zhvillimin shoqëror dhe ekonomik të Shqipërisë, paguhen me taksat e qytetarëve duke e rënduar edhe më shumë gjendjen e tyre ekonomike.”-shprehet Meta në postim. Presidenti i Republikës i bëri apel qytetarëve që në datën 25 prill të rivendosin rendin kushtetues dhe shtetin e së drejtës.