Qindra njerëz u shpëtuan nga rrënojat pas një tërmeti me magnitudë 7.1 që tronditi Tibetin të martën ndërsa ekipet e shpëtimit punojnë për të gjetur dhjetëra njerëz që ende mungojnë në apel. Tërmeti vrau të paktën 126 persona dhe ka plagosur mbi 200 të tjerë. Qendra e Rrjeteve të Tërmeteve të Kinës raporton ndërkohë se rajoni që nga goditja fillestare ka regjistruar më shumë se 500 pasgoditje, me magnitudë deri në deri në 4.4. Më shumë se 400 persona të bllokuar nën rrënoja janë shpëtuar, thanë zyrtarët kinezë, por numri i të zhdukurve ende mbetet i panjohur. Sipas transmetuesit shtetëror CCTV, Ministria e Menaxhimit të Emergjencave ka 1,850 pjesëtarë të skuadrave të shpëtimit në terren. Zyrtarët e qeverisjes vendore thonë se më shumë se 3,600 shtëpi janë shembur dhe 30,000 banorë janë zhvendosur. Tenda, jorgan, shtretër portativë dhe sende të tjera janë dërguar për të siguruar strehim për ata, shtëpitë e të cilëve janë të pabanueshme ose të pasigurta. Zonat përreth epiqendrës kanë një lartësi mesatare prej rreth 4200 metrash dhe temperaturat ranë shumë nën zero gjatë natës. Epiqendra e tërmetit të së martës ishte aty ku përplasen pllakat indiane dhe euroaziatike. Tërmetet e shkaktuara nga përplasja e pllakave tektonike janë të zakonshme në pjesët jugperëndimore të Kinës, Nepalit dhe Indisë veriore.