KESH nxorri në ankand 57 mijë megavat energji elektrike për të shitur në datat 18 deri në 22 shkurt, por vetëm 20 për qind të këtij volumi arriti që ta shesë dhe për më tepër me një çmim mbi pesëfish më të lirë se tregu. Korporata njoftoi shitjen e 10 mijë e 800 megavatëve me vlerën mesatare prej 15.55 eurosh për megavat. Shkak i shitjes së një të pestës së tepricës së energjisë lidhet me kërkesën e ulët në treg për shkak të mbiprodhimit ku pothuajse të gjitha vendet e rajonit në këtë periudhë të vitit eksportojnë energji, me përjashtim të Kosovës. Shifrat e publikuara nga KESH sugjerojnë se korporata po përballet me një situatë të pazakontë për shkak të prurjeve të mëdha në Kaskadën e Drinit dhe detyrimit për të shkarkuar ujin e tepërt, por pa prodhuar energji ne kapacitetet maksimale të saj. Të hënën, KESH nisi shkarkimet në të tre hidrocentralet e kaskadës, shkarkime që vijuan edhe të martën.