Venezuela ka reaguar me zemërim ndaj deklaratës së Presidentit amerikan Donald Trump se hapësira ajrore përreth vendit duhet të konsiderohet e mbyllur. Ministria e jashtme e vendit i quajti komentet e Trump "një tjetër agresion të paligjshëm dhe të pajustifikuar kundër popullit venezuelian". SHBA-të nuk kanë autoritet ligjor për të mbyllur hapësirën ajrore të një vendi tjetër dhe deklarata venezueliane e akuzoi Trumpin për një "kërcënim kolonialist". SHBA-të kanë rritur praninë e tyre ushtarake në zonë dhe kanë kryer të paktën 21 sulme ndaj anijeve që thonë se transportonin drogë, duke vrarë më shumë se 80 persona. Uashingtoni nuk ka ofruar prova për aksionet e tij dhe Presidenti i Venezuelës Nicolás Maduro thotë se lëvizjet, janë një përpjekje për ta rrëzuar atë. Trump ndërkohë shkroi në Truth Social: "Për të gjitha linjat ajrore, pilotët, trafikantët e drogës dhe qenieve njerëzore, ju lutemi merrni në konsideratë që hapësira ajrore sipër dhe përreth Venezuelës të mbyllet në tërësi". Me Trumpin që po i shton kërcënimet e tij, disa anëtarë demokratë dhe republikanë të Kongresit Amerikan kanë shprehur zemërim që ai nuk ka kërkuar miratim legjislativ. "Veprimet e pamatura të Trumpit ndaj Venezuelës po e shtyjnë Amerikën gjithnjë e më afër një lufte tjetër të kushtueshme të huaj", tha demokrati kryesor i Senatit Chuck Schumer në X të dielën. "Sipas kushtetutës sonë, Kongresi ka fuqinë e vetme për të shpallur luftë".