Numri i vizitorëve gjatë tetë muajve të parë të vitit është rritur me 1.3 milionë turistë krahasuar me po të njëjtën periudhë të një viti më parë. Kryeministri Edi Rama publikoi të dhënat e turistëve gjatë muajve janar-gusht, ku nënvizon se në total 8.5 milionë vizitorë zgjodhën Shqipërinë për destinacion. Shpërndarja gjeografike e vendeve të tyre të origjinës është edhe më e larmishme se vitin e kaluar. Sipas ecurisë së deritanishme deri në fund të këtij viti Shqipëria mund të presë 13 milionë turistë. Facebook Rama: “8,5 milionë vizitorë të huaj shijuan vendin tonë nga janari deri në gusht të këtij viti, jo vetëm më të shumtë në numër krahasuar me vitin e shkuar të shpërthimit të Shqipërisë Turistike, por edhe me një larmishmëri më të madhe të vendeve të origjinës, nga ku patjetër janë rritur flukset e mëparshme prej burimeve të mëparshme, po edhe janë shfaqur flukse të reja turistësh nga vendet të largëta si Meksika, Brazili, Kanadaja, Zelanda e re dhe Australia, po edhe nga Azerbajxhani, Kina e Japonia, ku shifrat premtojnë rritje të mëtejshme në rrugën drejt Shqipërisë 2030, ndërsa viti turistik vijon me grupe të tëra që shijojnë destinacionet e shumta nga veriu në jug, në majat e maleve, pikat e trashëgimisë kulturore, luginat e lumenjtë përgjatë trupit të mrekullueshëm të Shqipërisë, si edhe në Tiranën e kthyer në stacionin e preferuar të turistëve.” – shprehet kryeministri Edi Rama në Facebook. Rritjen më të madhe sipas të dhënave të publikuara nga Rama, e kanë pasur turistët nga Maroku dhe Kina.