Disa grupe të ekstremit të djathtë në Serbi kanë dalë hapur në mbështetje të Iranit, dhe kjo jo për shkak ideologjie, por vetëm në sajë të të pasurit të njëjtët armiq, Perëndimin dhe SHBA-në. Madje, disa prej tyre kanë bërë thirrje që Teherani të sulmojë bazën amerikane Bondsteel në Kosovë, duke ndarë mesazhe urrejtjeje të vazhdueshme. Por ky nuk është një rast i izoluar. Kanalet proruse dhe ultrakonservatore shpesh lidhin konfliktet globale me çështje lokale, duke përdorur Kosovën dhe bazën Bondsteel si simbol të pranisë amerikane dhe të kundërshtimit ndaj saj. Grupet e tjera si “Aksioni serb”, “Paladins” dhe “Doboshar” përshkruajnë Iranin si pengesë për planet izraelite, duke përforcuar një narrativë antiperëndimore të bashkërenduar me aktorë rusë. Në vetvete, mbështetja për Teheranin nuk është ideologjike, por taktike, duke e paraqitur Perëndimin si kundërshtarin kryesor dhe aktorët që luftojnë kundër tij si aleatë.