Ish-presidenti i Maqedonisë së Veriut, Stevo Pendarovski, ka folur për statusin e gjuhës shqipe dhe sfidat që lidhen me zbatimin e saj në praktikë, në një kohë kur një qytetar ka paraqitur një kërkesë në Gjykatën Kushtetuese për shfuqizimin e ligjit për përdorimin e gjuhës shqipe. Ai theksoi se shqipja ka status zyrtar në vend për shkak të përqindjes së popullsisë shqiptare, ndërsa përdorimi i saj rregullohet nga ligji për gjuhët, i cili sipas tij është ndryshuar disa herë ndër vite për të përmirësuar dhe garantuar të drejtat e shqiptarëve në institucionet shtetërore. Sipas tij, edhe pse shqiptarët kanë të drejtë ta përdorin gjuhën e tyre, në shumë raste kjo nuk reflektohet plotësisht në institucionet publike dhe në sistemin gjyqësor. Ai shtoi se ligji shpesh përdoret si argument politik nga disa parti për të treguar se janë miratuar standarde të larta për përdorimin e gjuhës shqipe, ndërkohë që në jetën e përditshme këto të drejta nuk zbatohen plotësisht. Ndërkohë, kërkesa për shfuqizimin e gjuhës shqipe do të shqyrtohet në një seancë të planifikuar, ndërsa ish-presidenti e konsideroi një problem serioz nëse ligji do të rrëzohej.