Arkëmorti me trupin e pajetë të kryepeshkopit të Shqipërisë, Anastas ka mbërritur në Katedralen ‘Ngjallja e Krishtit’ në Tiranë. Ai u nis nga Katedralja e Athinës, dhe hyri në territorin shqiptar përmes pikës së kalimit kufitar të Kakavijës rreth orës 8.30. Më pas u ndal dhe në disa të Gjirokastrës në shenjë nderimi nga besimtarët ortodoksë, ku dhe u prit nga qindra qytetarë me lule në duar dhe kurora me dafina. Pas kësaj kortezhi erdhi në Tiranën ku u vendos në katedralen ortodokse aty ku do të kryhen edhe homazhet për dy ditë radhazi. Policia e Tiranës ka bërë me dije se ka ndërmarrë masat e nevojshme për garantimin e mbarëvajtjes së homazheve për Kryepeshkopin Anastas. Në zbatim të këtyre masave, duke nisur nga ora 15:00 e së martës deri në orën 14:00 të së enjtes, me përjashtim të mjeteve të emergjencës dhe të Policisë së Shtetit, do të ndalohet qarkullimi i të gjitha mjeteve në rrugën përballë Katedrales Ortodokse. Pritet që kryeministri grek Kyriakos Mitsotakis do të jetë në Tiranë të enjten për të marrë pjesë në funeralin e kryepeshkopit Anastas Janullatos.