Dy cisternat ruse që derdhën naftë në ngushticën e Kerçit pasi u dëmtuan rëndë gjatë një stuhie të fuqishme të dielën, mbanin 62 mijë fuci naftë dhe produkte të naftës, njoftoi agjencia shtetërore e lajmeve TASS. Se sa nga karburanti që ato mbanin në bord ka rrjedhur, është ende duke u vlerësuar tha TASS. Agjencia shtoi se Volgoneft 212 mbante afërsisht 4,900 ton naftë në kohën e incidentit dhe Volgoneft 239, 4,300 ton. Ministria ruse e emergjencave tha të hënën se të 14 anëtarët e ekuipazhit nga Volgoneft 239 ishin shpëtuar. Anija u nda në dysh 80 metra larg bregut pranë portit të Tamanit. Ngushtica e Kerçit, e cila ndan Rusinë kontinentale nga Krimea e aneksuar nga Moska, është një rrugë kryesore për eksportet e drithërave ruse dhe produkteve të karburantit. Derdhja e karburantit në det ka potencialin të shndërrohet në një nga fatkeqësitë më të mëdha mjedisore që ka prekur rajonin vitet e fundit. Të dielën, një anëtar i ekuipazhit humbi jetën pasi Volgoneft 212 u nda në gjysmë. Njëmbëdhjetë të tjerë u dërguan në një spital lokal. Presidenti Vladimir Putin urdhëroi të dielën qeverinë të ngrejë një grup pune për t'u marrë me operacionin e shpëtimit dhe për të zbutur ndikimin e derdhjes, cituan agjencitë ruse të lajmeve të ketë thënë zëdhënësi i Kremlinit Dmitry Peskov.