Përpjekja e një të riut italian për të mashtruar autoritetet duke u paraqitur në zyrat e gjendjes civile për të rinovuar kartën e identitetit të nënës së tij të ndjesë dështoi në mënyrë spektakolare. Mediat matanë Adriatikut shkruajnë për një rast të pazakontë të ndodhur në Mantovano, ku djali i një 85-vjeçareje, që kishte ndërruar jetë prej vitit 2022 u paraqit i veshur si nëna e tij e ndjerë dhe i maskuar pranë zyrës së rinovimit të kartës së identitetit, që i kishte skaduar disa muaj më parë. Por, në vend të rinovimit të kartës së identitetit dhe vijimit të përfitimit të pensionit të pleqërisë, i riu u përball me prangat. Autoritetet thanë se punonjësit e zyrës ngritën dyshime kur vunë re se kishte dallime mes fotos së fundit të 85-vjeçares dhe personit që u paraqit në sportel për të rinovuar kartën e identitetit.