Duke filluar nga data një qershor, Shqipëria hedh poshtë maskat e koronavirusit duke i hapur dritën jeshile sezonit turistik të 2021. Dukshëm situata pandemike në vend është përmirësuar, nisur edhe nga ulja e numrit të qytetarëve, të cilët kanë marrë një përgjigje pozitive të testit të koronavirusit në harkun kohor të muajit të fundit. Në këtë panoramë epidemiologjike, kjo e martë sjell në fuqi lehtësim të masave kufizuese. Në ambientet e jashtme nuk është më e detyrueshme që qytetarët të mbajnë maskat mbrojtëse. E kundërta ndodh në ambientet e brendshme si dhe në transportin publik, ku mungesa e mundësisë për të siguruar distancimin social, e bën të detyrueshëm mbajten e maskës mbrojtëse. Megjithëse ora policore do të shtyhet në orën 23.00-06.00, klubet e natës dhe diskot do të vijojnë të mbeten të mbyllura, ndërkohë që muzika lejohet deri në orën 22.00 dhe asnjë minutë më shumë. Mesi i muajit qershor sjell lehtësim gradual të barrierave mbrojtëse ndaj Covid 19. Grumbullimet në ambientet e jashtme nga 10 persona do të shkojë në 50 persona, gjithmonë duke zbatuar me përpikmëri protokollet e vendosura nga Instituti i Shëndetit Publik.