Presidenti I SHBA, Donald Trump ka rikërcënuar Iranin, duke thënë se Shtetet e Bashkuara të Amerikës, mund të nisin sulme të reja nëse Teherani vazhdon të refuzojë lëshimet që ai dëshiron përpara se të arrihet një marrëveshje për t'i dhënë fund luftës në Lindjen e Mesme. Presidenti amerikan tha se kishte anuluar një valë të re sulmesh, të cilat do të kishin shkelur armëpushimin në fuqi që nga fillimi i muajit prill. Trump tha se një sulm i ri i SHBA-së do të shkaktonte “një goditje të madhe” në Iran, nëse në ditët në vijim nuk arrihet një marrëveshje paqeje. Analistët thonë se të dyja palët duan të shmangin një raund të ri armiqësish, por asnjëra nuk është e gatshme të paguajë çmimin politik të lëshimeve të nevojshme për të siguruar një marrëveshje paqeje. Irani vazhdon të bllokojë shumicën e transportit detar në ngushticën e Hormuzit, e cila transportonte rreth një të pestën e furnizimit botëror me naftë dhe gaz të lëngshëm para konfliktit, ndërsa SHBA-të kanë vendosur bllokadën e tyre detare në portet iraniane.