Maqedonia e Veriut regjistroi të premten katër viktima të reja nga Covid-19. Sipas njoftimit të Ministrisë së Shëndetësisë së këtij vendi, tre viktima janë nga Shkupi, të moshës 73,76 dhe 82 vjeçe dhe një nga Tetova i moshës 55 vjeçe. Me këto viktima numri i përgjithshëm i atyre që kanë humbur betejën me Covid-19 në vend ka mbërritur në 125. Janë regjistruar ndërkohë edhe 52 raste të reja të koronavirusi, shifër ditore kjo më e larta që nga muaji prill, kur vendi ndodhej pranë majës së epidemisë. Drejtuesit e institucioneve kanë shprehur shqetësim në lidhje me rritjen e numrit të të infektuarve duke bërë thirrje për kujdes të shtuar. Ministri i Shëndetësisë, Venko Filipçe tha se mosrespektimi i masave mund të çojë në rikthimin e kufizimeve. “Dua të bëjë qartë se do të zbatojmë kufizime në disa vende nëse gjendja epidemiologjike e kërkon një gjë të tillë, do të analizojmë të dhënat edhe gjatë fundjavës dhe do të shohim se si duhet të veprojmë”, deklaroi Filipçe duke kërkuar nga Ministria e Punëve të Brendshme angazhim më të madh për të garantuar respektimin e masave të Komisionit të Sëmundjeve Infektive. Numri i të infektuarve me koronavirus në Maqedoninë e Veriut ka shkuar në mbi 2,100. 487 raste ende janë aktiv, kurse mbi 1,500 janë shëruar.