Një person i shpallur në kërkim ndërkombëtar nga autoritetet austrike u kap në kryeqytet nga shërbimet e forcës së posaccme operacionale me qëllim ekstradimin drejt Interpol Vjena. Musli Aslani me origjinë nga Maqedonia e Veriut u lokalizua dhe u vendos në pranga nga operacionalja, teksa gjatë kontrollit fizik që iu ushtrua nga shërbimet policore, atij iu gjet një sasi lënde e dyshuar narkotike kanabisi, e cila u sekuestrua në cilësinë e provës materiale. 41 vjecari kërkohej për kryerjen e disa veprave të rënda penale, konkretisht për “Trafikim droge”, “Kërcënim i rrezikshëm”, “Zhvatje e rënduar”, dhe “Plagosje”, vepra të cilat parashikojnë një dënim maksimal deri në 20 vite burgim nga kodi penal Austriak. Urdhër arresti i tij u lëshua nga Zyra e Prokurorit Publik Innsbruck, Vjenë, Austri teksa 41 vjecari do mbahet në paraburgim në vendin tonë deri në përgatitjen e procedurave për ekstradimin e tij drejt shtetit austriak. Policia e shtetit vijon kontrollet për identifikimin dhe kapjen e personave të shpallur në kërkim kombëtar apo ndërkombëtar për vepra të ndryshme penale.