9 persona nga një grup kriminal që kryente trafikim të barnave me përmbajtje narkotike nga Italia në Shqipëri janë vënë para drejtësisë. Gjatë aksionit në Itali është sekuestruar një shumë prej 500 mijë euro nga llogaritë bankare të të dyshuarve si dhe barna me përmbajtje narkotike në vlerë prej 20 000 euro. Ndërkohë në Shqipëri, SPAK thotë se në bashkëpunim me policinë janë kryer 11 kontrolle në ambientet e banesave, zyrave shtetërore në QSUT dhe të subjekteve tregtare. Në mesin e të hetuarve rezultojnë 3 mjek shqiptarë mes tyre mjeku Qendrës Spitalore Universitare ‘Nënë Tereza’ Vladimir Peto, Aurel Vula, Ilir Broqja dhe dy biznesmenët Aleksandër Gjoka dhe Ndue Pulaj. Ilaçet për tumorin futeshin përmes dy shqiptarëve që u hetuan në Itali dhe që kanë kompani udhëtimi. Ka dyshime se shkresat fiktive në bashkëpunim mes mjekëve shqiptarë nën hetim dhe atyre italianë po ashtu nën hetim realizuan paraqitjen e të sëmurëve “të rremë” për të cilët firmosej për medikamentin e fortë që më pas dërgohej në Shqipëri dhe shitej në tregun e zi. Gjatë kontrolleve janë sekuestruar dokumente mjekësore, medikamente dhe pajisje kompjuterike pa dhënë më shumë detaje.