Një temperaturë prej 54.4 gradësh Celsius është regjistruar në Death Valley, në Kaliforni, në atë që shumë vëzhgues të motit besojnë se mund të jetë temperatura më e lartë e regjistruar në planet, që prej 1913-ës. Shërbimi kombëtar i motit, në Furnace Creek afër kufirit me Nevadën, shënoi temperaturën ekstreme në orën 3.41 minuta të së dielës pasdite. Kjo temperaturë e lartë konsiderohet ende paraprake dhe nuk është ende zyrtare-thuhej në një deklaratë. Nëse do të verifikohet, kjo do të jetë temperatura më e lartë zyrtarisht që nga korriku i 1913 po në “Luginën e Vdekjes”. Në rast se ndodh e gjitha kjo, temperatura në fjalë do të thyejë rekordin e mëparshëm për gushtin në Shtetet e Bashkuara. Rekordi i të gjitha kohërave i Luginës së Vdekjes sipas Organizatës Botërore Meteorologjike, është 56.7 gradë Celsius dhe është regjistruar më 10 korrik 1913.