Rreth 2800 protestues dolën në rrugët e Barcelonës dhe ‘sulmuan’ pushuesit me pistoleta uji, në protestën më të fundit kundër turizmit. Vendasit marshuan përgjatë një lagjeje bregdetare të qytetit me sloganin e tyre: "Mjaft më! Le të vendosim kufij për turizmin". Pamjet dramatike tregojnë turmat e banorëve të Barcelonës, të shtunën, duke mbajtur pankarta dhe pistoleta uji në duar. Dy gra shihen duke i drejtuar pistoletat me ujë, turistëve, me pamje të zemëruar në fytyrë. Disa turistë u lagën me pistoletat e ujit kur ishin duke darkuar jashtë në restorante, të tjerë ndërsa po shkonin në barin apo lokalin e planifikuar. Protestuesit mbanin në duar edhe pankarta ku shkruhej: "Barcelona nuk është në shitje" dhe "Turistët të kthehen në shtëpi". Shkak për këtë valë zemërimi është bërë edhe kriza aktuale e strehimit në barcelonë që thuhet se ka bërë që të rritet kostoja e qerave me 68 për qind, dekadën e fundit. Banorët vendas fajësojnë turistët për rritjen e cmimeve dhe kanë qenë të shumta protestat në qytetet kryesore turistike të spanjës. Vetëm barcelona ka pritur 12 milionë turistë vitin e kaluar ndërsa autoritetet po punojnë për marrjen e disa masave për korrigjimin e efekteve negative të turizmit masiv.