Kryeministri britanik Keir Starmer ka dënuar komentet e Elon Musk, sipas të cilit "lufta civile është e pashmangshme" pas trazirave të dhunshme në mbretërinë e bashkuar këto ditë. Pronari i X, e bëri postimin pas një video që tregonte njerëz që sulmonin policinë. Zëdhënësi i kryeministrit tha se nuk kishte "asnjë justifikim" për komentet e Musk, duke shtuar se kompanitë e mediave sociale mund dhe duhet të bënin më shumë. Sekretarja e drejtësisë, Heidi Alexander, po ahstu kritikoi miliarderin për komentet e tij "krejtësisht të pajustifikueshme" dhe " të mjerueshme". Trazirat në britani zgjasin në fakt prej gati një jave, pas vrasjes me thikë të tre vajzave të vogla në Southport. Ato u përhapën në qytete në të gjithë anglinë dhe në pjesë të irlandës së veriut, pasi u nxitën nga fushata e keqinformimit në internet si edhe nga ndjenjat anti emigrantë të ekstremit të djathtë. Pas postimit për ‘Luftën Civile’, të shtunën, Musk ka vijuar me komentet e tij për trazirat në mbretërinë e bashkuar. Ai reagoi pas një postimi në X të kryeministrit Starmer, ku ai thoshte se nuk do të toleronte sulmet ndaj xhamive apo komuniteteve myslimane. “A nuk duhet të shqetësoheni për sulmet ndaj të gjitha komuniteteve”, pyeti miliarderi. Elon Musk ka më shumë se 192 milionë ndjekës në platformë.