Thirrjet ndërkombëtare për lirimin e udheheqeses de fakto të Mianmarit, Aung San Suu Kyi një ditë pas një grusht ushtarak të shtetit, janë shtuar. Suu Kyi nuk është parë më në publik që prej ditës së hënë kur u arrestua. Ushtria, që mori pushtetin pas shpalljes së një gjendje të jashtëzakonshme, e akuzon partinë e saj për manipulime në zgjedhje. Presidenti amerikan Joe Biden kërcënoi të rivendosë sanksione ndaj Mianmarit, duke thënë se ushtria nuk duhet të "shkelë vullnetin e njerëzve". Sanksionet ishin lehtësuar pikërisht pasi vendi nisi të dilte nga një diktaturë ushtarake disa dekadëshe. Partia e Suu Kyi, Lidhja Kombëtare për Demokracinë kërkoi lirimin e saj të menjëhershëm dhe I bëri thirrje ushtrisë të pranojë rezultatin e zgjedhjeve të nëntorit, ku NLD rezulton fituese me 80% të votave. Një ditë pas grushtit të shtetit, në të gjitha qytetet kryesore të vendit, rrugët janë mbushur me patrulla ushtarake, ndërsa BBC thotë se mes njerëzve në Yangon mbizotëron ndjesia se e kanë humbur betejën e tyre për demokracinë.