Disa orë para Kuvendit të thirrur nga delegatët demokratë, Partia Demokratike ka thirrur në një mbledhje në selinë blu, kryetarët e saj në degë. Burime bëjnë me dije se takimi do të zhvillohet rreth orë 14:00 ndërsa në përfundim të këtij takimi do të ketë edhe një konferencë për mediet nga Sekretari i Përgjithshëm i Partisë Demokratike Gazment Bardhi. Ky takim vjen 1 ditë para Kuvendit të 11 dhjetorit dhe 1 javë para atij të 18 dhjetorit të propozuar nga kryedemokrati Lulzim Basha e të miratuar nga 26 anëtarë të Kryesisë. Kujtojmë se më 17 nëntor Lulzim Basha mblodhi për herë të fundit krerët e degëve, rreth përgatitjes për Kuvendin e 18 dhjetorit. Në një prononcim pas mbledhjes që zgjati rreth 5 orë, Sekretari i Përgjithshëm Gazment Bardhi u shpreh se mbledhja ishte shoqëruar nga një frymë e lartë bashkëpunimi ku vetëm 5 kryetarë nga 71 të tillë kishin disa shqetësime nga degët e tyre, por që sipas Bardhit ishin sqaruar.