Izraeli i ka kërkuar rezervistëve të ushtrisë që të përgatiten për një rishpërthim të mundshëm të luftës në Gaza nëse Hamasi nuk arrin të përmbushë afatin e së shtunës për të liruar pengje të tjerë izraelitë. Shqetësimi se armëpushimi afro një mujor do të shembet, po rritet, ndërsa zemërimi rritet po ashtu në botën arabe për planin e Presidentit Donald Trump që Shtetet e Bashkuara të marrin kontrollin e Gazës, të zhvendosin banorët e saj palestinezë dhe të ndërtojnë një resort bregdetar ndërkombëtar. Hamasi tha se Egjipti dhe Katari, të cilët me mbështetjen e SHBA-së ndërmjetësuan marrëveshjen e armëpushimit që hyri në fuqi më 19 janar, kishin shtuar përpjekjet për të thyer ngërçin dhe shefi i grupit militant palestinez të Gazës, Khalil Al-Hayya, mbërriti në Kajro për bisedime. Hamasi ra dakord në bazë të marrëveshjes për të liruar tre pengje të tjerë të shtunën, por tha këtë javë se po pezullonte dorëzimin për shkak të shkeljeve të kushteve nga Izraeli. Trump u përgjigj duke thënë se të gjithë pengjet duhet të lirohen deri në mesditën e të shtunës, përndryshe ai "do të linte të shpërthejë ferri". Ministri izraelit i Mbrojtjes, Israel Katz tha se armëpushimi kishte për qëllim të sillte një lirim të shpejtë të pengjeve të mbajtur në kushte të vështira në Gaza. "Nëse Hamasi ndal lirimin e pengjeve, atëherë nuk ka armëpushim dhe ka luftë," tha ai. Katz shtoi se "lufta e re e Gazës" do të ishte krejtësisht e një intensiteti tjetër dhe "do të lejojë realizimin e vizionit të Trumpit për Gazën". Kryeministri izraelit Benjamin Netanyahu tha të martën se Izraeli do të rifillonte "luftimet intensive" nëse Hamasi nuk përmbush afatin, por nuk tha se sa pengje duhet të lirohen. Netanyahu tha se kishte urdhëruar ushtrinë të mblidhte forcat në dhe rreth Gazës dhe ushtria njoftoi se po dislokonte forca shtesë në jug të Izraelit, afër Gazës, duke përfshirë mobilizimin e rezervistëve.