Banorët e Martaneshit protestuan ndaj përfaqësuesve të Bashkisë së Bulqizës në lidhje me planin e saj për të dhënë me qira një sipërfaqe disa hektarësh nga fondi pyjor dhe kullosor në këtë zonë. Në dëgjesën publike të mbajtur ditën e enjte, banorët u përplasën me përfaqësuesit e Bashkisë, duke kërkuar prej tyre më shumë transparencë për projektin. Banorët pretendojnë se dhënia me qira e këtyre pronave cenon aktivitetin e tyre familjar, kryesisht në sektorin e blegtorisë, teksa akuzojnë se toka po jepet për ndërtimin e një parku fotovoltaik. Përfaqësuesit e tyre thonë se bashkia nuk është konsultuar me ta në lidhje me këtë projekt dhe deklarojnë se nëse realizohet u cenohet seriozisht jetesa në këtë zonë, që e kanë të varur plotësisht nga blegtoria.