Rivlerësimi i pasurive të paluajtshme ka mbetur peng i zvarritjes së miratimit të akteve nënligjore nga ministria e financave. Ligji pritej të hynte në fuqi më 1 janar të këtij viti, por për shkak të vonesës së dekretimit nga presidenti Bajram Begaj, u tejkalua afati. Më 6 janar, presidenti Begaj firmosi dekretin presidencial dhe pas këtij momenti, ministria e financave së bashku me agjencinë shtetërore të kadastrës do të duhej të punonin për një udhëzim të përbashkët. Ende nuk ka asnjë udhëzim të bërë publik, ashtu sikurse nuk janë bërë publike aktet nënligjore nga ministria e financave. Kështu rivlerësimi i pronave, që pritet të prekë rreth 500 mijë familje ka mbetur vetëm në letër, dhe aktualisht është i pazbatueshëm. Agjencitë imobiliare shprehen se shtyrja e këtij procesi sjell efekte shumë negative, duke shtuar pasigurinë në treg përtej presioneve inflacioniste, që prej kohësh janë prezente.