Dy persona janë vënë në pranga nga policia e Shkodrës, pasi akuzohen për kultivim dhe shitje të lëndëve narkotike. Policia ka bërë me dije se këta 2 shtetas, njëri banues në Mnelë dhe tjetri në Mamurras, kishin përshtatur një kasolle për tharje dhe përpunim të bimëve narkotike. Uniformat blu njoftuan se në kuadër të operacionit antidrogë të koduar “Mnela”, u bë e mundur sekuestrimi i 7 kilogramëve kanabis në territorin e fshatit Mnelë. Strukturat hetimore të Drejtorisë Vendore të Policisë Shkodër, në bashkëpunim me Prokurorinë e Rrethit Gjyqësor Shkodër, vijojnë punën për identifikimin dhe vënien para përgjegjësisë ligjore të personave të tjerë të përfshirë në këtë veprimtari kriminale. Materialet procedurale i kaluan Prokurorisë pranë Gjykatës së Shkallës së Parë Shkodër, për veprime të mëtejshme hetimore.