Përfundoi pas rreth 7 orësh seanca maratonë në Gjykatën Kushtetuese për shqyrtimin e kërkesës së Erion Veliajt kundër shkarkimin nga detyra prej Qeverisë dhe po ashtu kundër dekretit të Presidentit për zgjedhje të pjesshme në Tiranë. Trupa gjykuese e Gjykatës Kushtetuese u tërhoq për vendim, i cili pritet te shpallet brenda 30 ditëve. Menjëherë pas seancës, Veliaj la ambientet e gjykatës dhe u nis drejt qendrës së paraburgimit të Durrësit, nën shoqërimin e Policisë së Burgjeve. Kjo ishte përballja e parë e Erion Veliajt me qeverinë dhe Presidencën pas 9 muajsh qëndrimi në qeli. Për herë të parë, u përballën në gjykatën më të lartë, institucionet kryesore drejtuese të shtetit. Një seancë maratonë publike pa tone të ashpra dhe pa tensione, por me gjuhë juridike, ku nuk munguan dhe ironitë nga palët. Përballja e Veliajt vijoi më tej me përfaqësuesit mbrojtës të Këshillit të Ministrave lidhur me vendimin e shkarkimit të tij. Përballë mbrojtjes së qeverisë, Veliaj ngriti pretendimin për pabarazi, teksa përmendi rastet e Tropojës dhe Rrogozhinës. Në fund, Erion Veliaj e mbylli me një mesazh për kandidatët aktualë të Bashkisë së Tiranës. Erion Veliaj mbahet nën masën e arrestit me burg prej datës 10 shkurt për akuzat e korrupsionit, shpërdorim detyre, pastrim parash, mosdeklarim pasurie, si dhe futje të sendeve të ndaluara në qeli.