Pas nënshkrimit të marrëveshjes mes Shqipërisë dhe Britanisë së Madhe për dëbimin e shqiptarëve ilegalë apo të dënuar, mediat britanike vijojnë t'i kushtojnë vëmendje kriminelëve shqiptarë në angli. Prestigjiozja Daily Mail, i ka kushtuar një shkrim të gjatë dhe ekskluziv, rrëmbimit dhe vrasjes së Jan Prengës. Kujtojmë se Prenga u rrëmbye në Kamëz dhe dyshohet se u vra në zonën e Shijakut, edhe pse trupi i tij nuk është gjetur ende. E gjitha lidhet me pazaret e drogës së vëllezërve të tij, për një sasi rekord kokaine, 260 kg. Në janarin e vitit të shkuar, sipërmarrësi shqiptar Ndrek Prengën mori një telefonatë të papritur biznesi. Personi që po telefononte ishte një baron droge, drejtuesi i një karteli famëkeq shqiptar, i quajtur Dritan Rexhepi. Ai po e merrte nga 6000 milje larg, nga një burg në Ekuador. Rexhepi i tha Prengës se duhej të kthenin kokainën që kishte vjedhur, përndryshe vëllai i tij që kishin rrëmbyer në rrugët e Shqipërisë, do vritej. Bëhët fjalë pikërisht për ngarkesën e dhjetorit të vitit 2019, një ngarkesë që mbërriti në Britani nga portet e Ekuadorit. Brenda saj kishte një sasi prej 260 kg kokainë me një vlerë prej 20 milionë sterlina. Sipas dokumenteve të para nga Daily Mail, Veri Prenga dhe dy bashkëpunëtorë të tij u punësuan nga ndërmjetës britanikë dhe iranianë për të marrë drogën në port. Ata e morën drogën, por këtu ndodhi kthesa katastrofike. Korrierët shqiptarë ndoshta u bënë lakmitarë kur panë ngarkesën në kontenier. Cilido të ishte motivi, Veri Prenga dhe bashkëpunëtorët e tij nuk e dorëzuan drogën dhe e morën për vete. Mosdorëzimi i ngarkesës së drogës solli edhe vrasjen pa lënë as gjurmë dhe as trupin e viktimës në vendngjarjë.