Dy pjesëtarë të lartë demokratë të Senatit, kanë bërë thirrje për një hetim mbi kontaktet e raportuara të Elon Musk me presidentin rus Vladimir Putin dhe ndihmësit e tij të lartë. Ligjvënësit i kanë kërkuar Pentagonit dhe Departamentit të Drejtësisë që të përcaktojnë nëse marrëdhëniet e supozuara të Musk me një kundërshtar të SHBA-së, në një kohë kur ai ka kontrata të mëdha qeveritare, vënë në rrezik sigurinë kombëtare. Ëall Street Journal raportoi muajin e kaluar se personi më i pasur në botë ka pasur "disa biseda" me Vladimir Putinin që nga viti 2022, gjë që Kremlini e ka mohuar. Musk në anën tjetër shkroi në platformën e tij X të premten se ai "do të zbulojë se kush i bën këto akuza dhe do t'i hedhë atyre bombën bërthamore". Dy demokratët - Senatori i Rhode Island, Jack Reed, njëkohësisht kryetar i Komitetit të Shërbimeve të Armatosura të Senatit, dhe Senatorja e Neë Hampshire-it, Jeanne Shaheen, një demokrate e lartë në Komitetetin e Shërbimeve të Armatosura dhe Marrëdhënieve me Jashtë, i dërguan një letër të premten Prokurorit të Përgjithshëm Merrick Garland dhe Inspektorit të Departamentit të Mbrojtjes, gjeneralit Robert Storch, ngritën "pikëpyetje serioze në lidhje me besueshmërinë e Musk si një kontraktor qeveritar dhe një mbartës i certifikatës së sigurisë". Multimiliarderi pretendon se ka një certifikatë sigurie të nivelit të lartë dhe kompania e tij SpaceX është e përfshirë thellë në infrastrukturën e mbrojtjes dhe inteligjencës të qeverisë federale, ndërkohë që është edhe kontraktorja kryesore e NASA-s. “Ambiciet e Rusisë në fushën e hapësirës paraqesin një kërcënim të drejtpërdrejtë për sigurinë kombëtare të SHBA-së”, shkruajnë senatorët. Reed dhe Shaheen vënë në dukje se, ndryshe nga të tjerët me leje sigurie të nivelit të lartë, Musk nuk duket të raportojë për kontaktet e tij me zyrtarë të qeverive të huaja. Musk, i cili mbështeti Donald Trump për zgjedhjet presidenciale, u zgjodh prej tij këtë javë për të udhëhequr një Departamenti të ri të Efikasitetit të Qeverisë.