Nënkryetari i Partisë Demokratike Agron Gjekmarkaj ka hequr dorë nga të gjitha funksionet e Partisë Demokratike. Ky vendim ishte deri diku I pritshëm, ndërsa Gjekmarkaj e paralajmëroi një lëvizje të tillë në rrjetet e tij sociale pasditen e kësaj të hëne. Ky hap erdhi pas humbjes së rëndë të Partisë Demokratike në zgjedhjet e pjesshme të 6 marsit, ku opozita nuk doli forcë e parë në asnjë bashki. Gjekmarkaj është shprehur se ai do të qëndrojë vetëm në funksionin e deputetit të thjeshtë. Në mbledhjen e mbajtur me dyer të mbyllura është kërkuar dorëheqja e kreut të partisë demokratike Lulzim Basha, ku ky i fundit është përgjigjur me argumentin se nuk ka humbur asnjë garë, por votat I kanë vjedhur. Mbledhja vazhdon ende, ndërsa detaje të tjera nga ky takim pritet të bëhen publike në orët në vijim. Kujtojmë se PD ka dalë forcë e tretë në këto zgjedhje, e kryesuar nga PS dhe “Shtëpia e Lirisë”. Me humbjen edhe të Shkodrës, Partia Demokratike nuk ka më asnjë nga 61 bashkitë e vendit.