Ligji për barazinë gjinore, që shkaktoi përplasje të forta mes palëve politike, por u kundërshtua dhe nga qytetarë e aktivistë, do të hyjë në fuqi pa dekretin e Presidentit të Republikës, Bajram Begaj. Afati kushtetues prej 20 ditësh, që Kreu i Shtetit të firmoste ligjin e miratuar në Kuvend vetëm me votat e socialistëve ka mbaruar, duke bërë që ligji për barazinë gjinore të kalojë në heshtje. Pas miratimit nga Kuvendi, një grup qytetarësh dhe aktivistësh i kërkuan Presidentit Begaj që të mos e dekretonte ligjin për barazinë gjinore. Një kërkesë e tillë u dërgua në zyrën e Begajt edhe nga opozita, përmes një letre të firmosur nga 12 gra deputete, që e konsideronin draftin si antikushtetues dhe që cenon të drejtat e njeriut, me qëllim kryesor shkatërrimin e familjes. Ligji u kundërshtua nga komunitetet fetare dhe shoqata “Pro familjes”, ndërsa përfaqësitë ndërkombëtare në Tiranë dhe shumë organizata të shoqërisë civile e përshëndetën nismën e qeverisë shqiptare. Ligji u miratua në seancën maratonë të 6 nëntorit me 77 vota pro të mazhorancës, ndërsa 36 deputetë të opozitës votuan kundër. Ndërsa për opozitën, ky ligj shkatërron familjen, mazhoranca që e propozoi dhe e miratoi thekson se ligji është i standardeve më të larta, garanton barazi mes burrit e gruas dhe ndalon diskriminimin me bazë përkatësinë gjinore, në fushë sociale, politike apo ekonomike. Pra, heq të gjitha dallimet, përjashtimet, kufizimet me bazë gjinore dhe mos njohje të të drejtave të një gjinie të caktuar. Ditët në vijim pritet që ligji për barazinë gjinore pritet të botohet në fletoren zyrtare dhe të hyjë në fuqi 15 ditë më pas për të nisur zbatimin në praktikë.