Kryeministri kanadez Justin Trudeau pritet të njoftojë se do të japë dorëheqjen, megjithëse nuk ka marrë ende një vendim përfundimtar, tha të dielën një burim i njohur me zhvillimet. Burimi foli për Reuters pasi Globe and Mail raportoi se Trudeau pritej të njoftonte që të hënën se do të largohej nga posti i udhëheqësit të Partisë Liberale në pushtet, pas nëntë vjetësh në detyrë. Burimi kërkoi anonimitetin sepse nuk ishte i autorizuar të fliste publikisht. Largimi i Trudeau do ta linte partinë pa një kryetar në një kohë kur sondazhet tregojnë se liberalët do të humbasin keq përballë konservatorëve të opozitës në zgjedhjet që duhet të mbahen deri në fund të tetorit. Burimet i thanë Globe and Mail se nuk e dinin me siguri se kur Trudeau do të njoftonte planet e tij për t'u larguar, por thanë se presin që kjo të ndodhë përpara një takimi urgjent të ligjvënësve liberalë të mërkurën.