‘Akt absolutisht i papranueshëm’ është vlerësuar djegia e kukullave me pamjen e presidentit të Serbisë Aleksandër Vuçiç dhe atij të Rusisë, Vladimir Putin, në një festë me maska në Kashtel Stari, dhe për këtë shkak Serbia i ka dërguar një notë proteste Kroacisë. Zëvendës-kryeministri dhe ministri i jashtëm serb, Ivica Daçiç e ka dënuar ashpër incidentin e djegies së kukullave me figura të Putinit dhe Vuçiçit në Kroaci, dhe në notën e protestës të dërguar në ambasadën kroate në beograd, thuhet: “Dënojmë ashpër incidentin që ndodhi më 13 shkurt në karnavalet e përvitshme në Kashtel Stari në Kroaci. Djegia e kukullës me figurën e presidentit Vuçiç përbën një akt absolutisht të papranueshëm, që është në kundërshtim me përcaktimin e përbashkët për normalizimin e raporteve dhe avancimin e bashkëpunimit gjithëpërfshirës mes vendeve tona”.