Ish-presidenti brazilian, Jair Bolsonaro, pretendoi se kishte tentuar të prishte byzylykun në kyçin e këmbës për shkak të 'halucinacioneve' dhe një 'krize nervore'. Udhëheqësi populist, 70 vjeçar, u prangos të shtunën për dyshimin se planifikonte t'i shpëtonte arrestit shtëpiak, disa ditë para se të fillonte një dënim të gjatë me burg për një komplot për grushti shteti. Bolsonaro ka qenë nën arrest shtëpie që nga gushti, por u vu në mënyrë dramatike pas hekurave në Brasilia këtë fundjavë. Autoritetet thanë se kjo ishte një masë parandaluese për ta penguar atë të arratisej, në një përpjekje që dyshohej se ishte planifikuar për më vonë atë ditë. Por Bolsonaro vetë i tha gjykatësit se ai kishte patur ‘halucinacione’ se përgjohej përmes aparatit të vendosur në kyçin e këmbës, ndaj u përpoq ta dëmtonte atë. Ish presidenti shtoi se nuk mbante mend të kishte patur një krizë të kësaj shkalle ndonjëherë tjetër dhe se ndoshta kjo mund të ishte shkaktuar nga ndonjë ndryshim në ilacet e tij. Bolsonaro po ashtu mohoi se kishte tentuar të arratisej. Bolsonaro u dënua me 27 vjet burg pasi u dënua për një komplot për grushti shteti që përfshinte helmimin e presidentit aktual, Luiz Inacio Lula da Silva.