5 persona kanë rënë në prangat e policisë dhe 100 të tjerë janë proceduar për krime mjedisore. Uniformat blu kanë vijuar një aksion në mbarë vendin përgjatë gjithë kësaj jave. Sipas një njoftimi të bërë zyrtar nga ky institucion, bëhet fjalë për një numër të madh krimesh mjedisore. Në total janë evidentuar 90 raste, ku janë angazhuar 1125 efektivë. Numri më i madh i rasteve lidhet kryesisht me ndërtimet e paligjshme, ku rezultojnë 35 të tilla. 23 raste pushtim toke, 13 prerje e paligjshme e pyjeve, 7 për ndotje të ajrit e duke vijuar më tej me ndotje të ujërave, shkatërrim prone, gërryerja lumenjsh, peshkim i ndaluar etj. Në total janë 106 autorë nga ku 5 janë arrestuar në flagrancë, 100 të proceduar dhe 1 i shpallur në kërkim. Policia bën me dije se aksionet do të vijojnë edhe në ditët në vazhdim. Sipas tyre nuk do të ketë tolerime për asnjë person i cili kapet duke kryer krime mjedisore.