Komisioni i Pavarur i Kualifikimit ka vendosur shkarkimin përfundimtar nga detyra të gjyqtares Zegjine Sollaku, bashkëshorten e ish kryeprokurorit të Përgjithshëm, Theodhor Sollakut. Trupa gjykuese e përbërë nga Xhensila Pine, Lulzim Hamitajn dhe Suela Zhegu evidentuan se gjyqtarja nuk justifikonte 7 milionë lekë, 6 apartamente dhe një automjet. Gjatë seancës gjyqësore u relatuan probleme në justifikimin e një sasie të konsiderueshme parash si dhe investimeve të bëra nga gjyqtarja Zegjine Sollaku, të cilat nuk rezultojnë nga burime të qëndrueshme financiare. Analiza e detajuar financiare, nxori në pah apartamente luksoze dhe makina, për të cilat gjyqtarja Zegjine Sollaku ngriti pretendimet se ishin përfituar nëpërmjet punës private të saj dhe të bashkëshortit, ish kryeprokurorit Sollaku.