Presidentja e Kosovës, Vjosa Osmani, ka pritur në takim homologun e saj nga Maqedonia e Veriut, Stevo Pendarovski. “Procesi i integrimit evropian është prioritet që na bashkon dhe në këtë rrugë ne do të vazhdojmë ta ndihmojmë njëra-tjetrën”, tha Osmani, sipas një njoftimi të presidencës. Osmani tha po ashtu se përfshirja e Kosovës në Partneritetin për Paqe, e më pas në NATO, është garanci për stabilitet në rajon. Partneriteti për Paqe është një program i NATO-s, që synon krijimin e besimit midis shteteve anëtare të NATO-s dhe shteteve të tjera në Evropë. Qeveria e Kosovës e ka krijuar tashmë një grup pune për anëtarësimin në këtë program. Shtetet e Bashkuara e kanë mbështetur kosovën në realizim të këtij synimi por kanë rikujtuar se për një vendim të tillë kërkohet miratimi i 30 vendeve anëtare të Aleancës. Nga 30 vende anëtare të NATO-s, Kosovën si shtet të pavarur e kanë njohur 26 prej tyre, ndërsa katër (Greqia, Rumania, Sllovakia dhe Spanja) ende jo. Osmani tha po ashtu se Kosova dhe Maqedonia e Veriut kanë vizion të përbashkët për një Ballkan Perëndimor stabël dhe të integruar në BE. Sipas Osmanit, shqiptarët në Maqedoninë e Veriut janë urë lidhëse mes të dy shteteve dhe "shtyllë e stabilitetit". “Anëtarësimi në Këshillin e Evropës është në funksion të mbrojtjes së të drejtave të njeriut të të gjithë qytetarëve të Kosovës pa dallim”, tha Osmani duke shtuar se “Kosova meriton ta marrë statusin e vendit kandidat në BE”. Pjesë e agjendës së Pendarovskit në Prishtinë është edhe takimi me kryeministrin Albin Kurti.