Organizata Botërore e Shëndetësisë shprehu shqetësimin e saj për ritmin e përhapjes së sëmundjes, që sipas saj, po përshkallëzohet prej personave të moshës 20, 30 dhe 40-vjeçare, shumica e të cilëve nuk janë të vetëdijshëm se janë prekur nga koronavirusi. Drejtues të OBSH-së kanë vënë re se këtë muaj shifrat e të rinjve të infektuar kanë pësuar një rritje në nivel global, dhe ky fenomen sipas tyre është tejet i rrezikshëm sepse kërcënon kategoritë e ndjeshme të shoqërisë në gjithë botën, duke përfshirë këtu të moshuarit dhe të sëmurët. Kreu i OBSH-së për rajonin e Paqësorit, Takeshi Kasai, deklaroi se epidemia po ndryshon. Sipas tij, shumë prej të personave të moshave të reja nuk janë të vetëdijshëm se janë infektuar, dhe kështu përhapin pa fre virusin.