Koreja e Veriut dënoi inkursionin e Ukrainës në Rusi duke e quajtur atë një akt terrori të pafalshëm të mbështetur nga Uashingtoni dhe Perëndimi, ndërsa shtoi se do të qëndrojë gjithmonë në krah të Rusisë e cila po lufton të mbrojë sovranitetin e saj, thanë media shtetërore të dielën. Përpjekja e Ukrainës në Rusi, është produkt i politikës konfrontuese anti-ruse të Shteteve të Bashkuara, që po e shtyjnë botën drejt Luftës së Tretë Botërore, tha agjencia e lajmeve KCNA. SHBA i ka dhënë shuma “astronomike” armësh vdekjeprurëse presidentit të Ukrainës, Volodymyr Zelenskiy, thuhet më tej në raport. “Ne e dënojmë fuqishëm sulmin e armatosur kundër territorit rus nga regjimi kukull i Zelenskit nën kontrollin dhe mbështetjen e Shteteve të Bashkuara dhe Perëndimit si një akt të pafalshëm agresioni dhe terrori”, tha Ministria e Jashtme e Koresë së Veriut në një deklaratë. Koreja e Veriut ka përmirësuar në mënyrë dramatike lidhjet e saj me Rusinë vitin e kaluar me dy takime të nivelit të lartë të liderëve të tyre, të cilët u zotuan për bashkëpunim më të ngushtë në të gjitha fushat. Në qershor, udhëheqësi i Koresë së Veriut Kim Jong Un dhe presidenti rus Vladimir Putin nënshkruan një pakt në Phenian mbi "partneritetin gjithëpërfshirës strategjik" që përfshinte një marrëveshje të mbrojtjes reciproke. Koreja e Jugut, Ukraina dhe Shtetet e Bashkuara kanë akuzuar Korenë e Veriut për furnizimin me armë dhe raketa të Rusisë, e cila i përdor ato në luftën kundër Ukrainës.