Ushtarët e Koresë së Veriut janë angazhuar tashmë në operacione luftarake kundër Ukrainës së bashku me aleatët e tyre rusë, tha të mërkurën agjencia e spiunazhit të Koresë së Jugut. Konfirmimi i Seulit vjen mes kritikave në rritje globale pasi të dy vendet po forcojnë lidhjet ushtarake e pasi Pheniani dërgoi mijëra trupa në rajonin e Kurskut në Rusi për të ndihmuar në luftën e Putinit në Ukrainë. “Shërbimi Kombëtar i Inteligjencës vlerëson se trupat e Koresë së Veriut të dërguara në Rusi janë zhvendosur në rajonin e Kurskut gjatë dy javëve të fundit”, tha agjencia në një deklaratë. Ata kanë përfunduar vendosjen në fushën e betejës dhe tashmë po marrin pjesë në operacione luftarake, shtoi agjencia. Të martën, media shtetërore e Koresë së Veriut tha se Pheniani kishte ratifikuar një traktat të mbrojtjes reciproke me Rusinë të nënshkruar në qershor nga krerët e dy vendeve, duke parashikuar që secili do t'i vinte në ndihmë tjetrit në rast të një sulmi të armatosur. Edhe departamenti amerikan i shtetit konfirmoi një ditë më parë se njësitë e koresë së veriut kanë filluar tashmë të luftojnë në krah të njësive ruse.