Ministri i Jashtëm gjerman, Heiko Maas deklaroi se vendet e Ballkanit Perëndimor, që duan perspektivë europiane, duhet që edhe zgjidhjet politike, veçanërisht në konfliktin Kosovë-Serbi, t`i kenë me BE-në. “Për këtë jam shumë, shumë i sigurtë që Bashkimi Europian do të luajë rol të rëndësishëm, sidomos në situatën e vështirë që kemi në moment. Nëse Ballkani Perëndimor dikur do të vijë në Europë duhet që dialogun, para së gjithash ta zhvillojë me BE-në.Unë besoj, se në Ballkanin Perëndimor e dinë këtë, dhe se Bashkimi Europian do të forcojë angazhimin e tij, pikërisht tani”, tha Maas për DW. Kryediplomati gjerman shtoi se kjo do të jetë një temë e rëndësishme tani. “Ne jemi angazhuar në pandeminë e koronavirusit që fqinjësia jonë e drejtpërdrejtë me Ballkanin, por edhe fqinjësia lindore të mos harrohet. Natyrisht, duam të japim kontribut që të ketë një zgjidhje politike në Ballkanin Perëndimor, sidomos në konfliktin mes Kosovës e Serbisë. Dhe këto vende duhet që këto zgjidhje t'i dakordojnë me Bashkimin Europian, nëse e duan një perspektivë europiane", nënvizoi ministri I jashtëm gjerman.