Kompanitë e Kosovës kanë arritur të eksportojnë mallra në Shtetet e Bashkuara në vlerë 30 milionë euro në katër muajt e këtij viti ndërsa një vit më parë, në të njëjtën periudhë, shifra ishte vetëm 2 milionë euro. Kjo është konfirmuar për radion Evropa e Lirë nga zëdhënësi i doganës së kosovës, Adriatik Stavileci. Kurse në vitin 2019, e gjithë vlera e eksporteve nga Kosova në SHBA ishte vetëm 3 milionë euro. Kjo rritje e eksportit ka ardhur për shkak të statusit preferencial tregtar, që Kosova gëzon me Shtetet e Bashkuara të Amerikës, status ky që i lejon dërgimin e mallrave të liruara nga detyrimet doganore, me qëllim të promovimintë të rritjes ekonomike në shtetet në zhvillim. Janë rreth 3,500 produkte nga sektorë të ndryshëm, që Kosova mund t’i eksportojë në ekonominë më të madhe të botës, pa pasur nevojë të paguaj taksa. Arsyeja e rritjes se eksportit të produkteve “ Made in Kosova” në Shtetet e Bashkuara të Amerikës, është shfrytëzimi i çrregullimeve që janë krijuar në zingjirin e furnizimit global, përgjatë viteve të fundit, sidomos pas shpërthimit të pandemisë se shkaktuar nga koronavirusi, thotë edhe Arian Zeka, drejtor ekzekutiv në Odën Ekonomike Amerikane në Kosovë. Ai e quan sukses rritjen e eksportit, pasi sipas tij, po eksportohen produkte finale. GSP është program tregtar i Shteteve të Bashkuara të Amerikës, i cili lejon importe të liruara nga detyrimet doganore të mallrave nga shtetet përfituese, me qëllim promovimin e rritjes ekonomike në shtetet në zhvillim. Rreth 3,500 produkte nga sektorë të ndryshëm nga Kosova, janë të pranueshme për të hyrë në Shtetet e Bashkuara të Amerikës pa paguar taksë.