Marrëveshja e votuar në Kuvend me konsensusin e Partisë Demokratike të drejtuar nga ish-kryeministri Sali Berisha dhe maxhoranca socialiste për listat e kandidatëve për deputetë, ka nxjerr në pah edhe vështirësitë e para për subjektet politike. Mbrëmjen e së mërkurës, Partia Demokratike mblodhi Kryesinë, nga ku u lexuan emrat e drejtuesve politikë në qarqe. Ajo që bëri përshtypje, ndryshe nga zgjedhjet e mëparshme, ishte fakti që Tirana, qarku më i madh dhe i rëndësishëm i vendit, iu la në dorë vetëm një personi, konkretisht Belind Këlliçit. Edhe pse ishte folur për të paktën 4 koordinatorë për Tiranën dhe nga një për qarqet e tjera të rëndësishme e të mëdha të vendit, kjo u përjashtua në këto zgjedhje. Marrëveshja për listat, që për demokratët nuk është marrëveshje për reformën zgjedhore por zbatim i vendimit të Gjykatës Kushtetuese, i ka kushtëzuar ata në vendimmarrje.