Pak ditë më parë qeveria shqiptare përmes një vendimi i hapi rrugën negocimit edhe për vaksinën kineze “Sinopharm” dhe atë ruse “Sputnik V”. Përmes një përgjigjeje zyrtare, Ambasada kineze shprehu gatishmërinë duke theksuar se “rruga e komunikimit midis dy palëve për zhvillimin e bashkëpunimit mbi vaksinën është e hapur”, nëse dëshiron pala shqiptare. Por në vijim të deklaratës, Ambasada thekson se hyrja e vaksinës kineze në Shqipëri ka të bëjë me një sërë problemesh teknike, ndërsa shton se në qoftë se pala shqiptare ka interes, mund të kontaktojë direkt me kompanitë përkatëse kineze, që është “Sinopharm”. “Kina mbështet me vendosmëri bashkëpunimin ndërkombëtar mbi vaksinën anti-Covid-19. Kina dhe Shqipëria gëzojnë një miqësi tradicionale, rruga e komunikimit midis dy palëve për zhvillimin e bashkëpunimit mbi vaksinë është e hapur. Hyrja e vaksinës kineze në Shqipëri ka të bëjë me një sërë problemesh teknike. Në qoftë se pala shqiptare ka interes për vaksinën kineze, mund të kontaktojë direkt me kompanitë përkatëse kineze. Ambasada kineze është e gatshme të japë asistencën e nevojshme. Gjithashtu, jemi të kënaqur të shohim që Shqipëria të sigurojë sasi të mjaftueshme të vaksinës nëpërmjet rrugëve të ndryshme, dhe kemi dëshirë për të ofruar mbështetje të nevojshme”, ka deklaruar Ambasada kineze në Tiranë. Kujtojmë që pak ditë më parë, qeveria miratoi një vendim të ri, më anë të të cilit i dha “dorë të lirë” ministres së Shëndetësisë dhe të Ministrisë së Rindërtimit për zhvillimin e negociatave me shtetet që prodhojnë vaksina, pa përjashtuar askënd. I vetmi kusht është që vaksinat duhet të jenë të certifikuara nga trupa përkatëse në vendin e prodhimit të tyre, duke lënë të hapur mundësinë që Shqipëria të negociojë direkt edhe me ato shtete, që më parë i kishte përjashtuar si mundësi, Rusinë dhe Kinën. Sakaq vendet e rajonit si Serbia dhe Maqedonia e Veriut e kanë marrë vaksinën kineze. Gjithashtu edhe vende të Bashkimit Europian si Hungaria, dhe Republika çeke kanë marrë vaksinat kineze. Para pak ditësh Kina miratoi një tjetër vaksinë kundër Covid-19, e cila ishte e 5 nga numri i vaksinave kineze. 4 nga këto vaksina janë aprovuar për përdorim emergjent. Të 5 vaksinat janë krijuar nga kompani kineze.