Udhëheqësi i Koresë së Veriut, Kim Jong Un, ka urdhëruar “prodhim masiv” të dronëve sulmues, raportoi media shtetërore të premten ndërsa shqetësimet po rriten lidhur me thellimin e bashkëpunimit mes Penianit dhe Rusisë. Peniani fillimisht prezantoi dronët e tij sulmues në gusht, ndërsa ekspertët thanë se aftësia për të prodhuar armë të tilla mund t’i atribuohet aleancës së Koresë së Veriut me Rusinë. Korja e Veriut ka ratifikuar një pakt mbrojtjeje me Rusinë, ndërsa po akuzohet se ka dërguar mijëra trupa në Rusi për të mbështetur luftën e Moskës kundër Ukrainës. Ky fakt ka shtyrë presidentin e Koresë së Jugut, Yoon Suk Yeol, që të paralajmërojë për mundësinë e transferimit nga Rusia te Koreja e Veriut të teknologjisë së ndjeshme ushtarake. Kim jong un një ditë më parë mbikëqyri dizajnimin e dronëve, që mund të shënjestrojnë edhe objektiva tokësore dhe detare, e që po prodhohen në kompleksin e Koresë së Veriut për prodhimin e dronëve, tha media shtetërore koreanoveriore, KCNA. “Ai theksoi nevojën e ndërtimit të një sistemi të prodhimit në seri, sa më shpejt që të jetë e mundur dhe të shkohet në prodhim masiv”, raportoi KCNA. Dronët janë të dizajnuar që të mbajnë mjete shpërthyese dhe mund të përplasen me shënjestrat armike dhe kështu të veprojnë edhe si raketa të telekomanduara. Sipas KCNA-së, në testimet e kryera të enjten, dronët goditën “në mënyrë precize” objektivat e tyre. “Dronët kamikazë me rreze të ndryshme veprimi duhet të kryejnë misione për të sulmuar në mënyrë precize çdo objektiv armiku në tokë dhe në det”, tha agjencia. Kim jong un tha ndërkohë se dronët “janë të lehtë për tu përdorur”, për të kryer sulme dhe po ashtu kanë kosto relativisht të ulët prodhimi. Ai tha se Koreja e Veriut “i ka kushtuar rëndësi kohët e fundit” prodhimit të dronëve dhe integrimit të tyre në strategjinë e përgjithshme ushtarake të vendit. Ekspertët kishin thënë më herët se dronët, imazhet e të cilëve u publikuan në gusht nga Koreja e Veriut, dukeshin të ngjashëm me dronët HAROP, të prodhuar nga Izraeli, dronët Lancet-3 të prodhimit rus dhe dronët HERO 30 të prodhuara po ashtu nga Izraeli. Koreja e Veriut mund të ketë marrë teknologji për prodhimin e dronëve nga Rusia, e cila me gjasë i ka marrë nga Irani, ndërsa vet Teherani akuzohet se e ka vjedhur këtë teknologji nga Izraeli.