Presidenti i Shteteve të Bashkuara të Amerikës, Donald Trump, ka paditur të përditshmen The Neë York Times, katër prej gazetarëve të saj dhe shtëpinë botuese Penguin Random House, duke kërkuar një dëmshpërblim prej të paktën 15 miliardë dollarësh me pretendimin se ka qenë viktimë e shpifjeve dhe se i është dëmtuar reputacioni. Padia e Trumpit në një gjykatë në Florida përfshin disa shkrime të Neë York Times-it, njëri prej të cilëve ishte editorial para zgjedhjeve presidenciale të 2024-tës, që thoshte se ai nuk ishte i denjë për postin më të lartë shtetëror, dhe një libër të publikuar nga Penguin Random House, të titulluar “Humbësi me fat: Si e shpërdoroi Donald Trump pasurinë e të atit dhe krijoi iluzionin e suksesit”. “Të pandehurit kanë publikuar me keqdashje librin dhe artikujt, duke e ditur se këto botime ishin plot shtrembërime dhe fabrikime të pështira për presidentin Trump”, thuhet në padinë e dorëzuar në Gjykatën e Qarkut në Florida. Avokatët e Trump kanë thënë se botimet kanë dëmtuar reputacionin personal dhe biznesor të Trumpit, duke shkaktuar dëm masiv ekonomik ndaj vlerës së markës së tij, dhe dëme të konsiderueshme ndaj perspektivës së tij financiare. Padia erdhi pasi Trump kërcënoi javën e kaluar se do të padiste Neë York Times-in për raportimet e gazetës për një urim ditëlindjeje që mbante edhe një vizatim sugjestiv për Jeffrey Epstein. Ky i fundit, financier famëkeq i dënuar për krime seksuale, vrau veten në një qeli burgu në Nju-Jork, më 2019. Në mandatin e tij të dytë, Trump ka intensifikuar luftën me kompanitë mediale. Më herët, këtë vit, ai paditi gazetën The Ëall Street Journal dhe botuesit e saj, përfshirë Rupert Murdoch, duke kërkuar dëmshpërblim prej të paktën 10 miliardë dollarësh për shkak të raportimit se emri i tij ishte në një urim ditëlindjeje për Epsteinin më 2003.