Ekipet e shpëtimit nga shtetet fqinje të Bosnjë e Hercegovinës dhe nga Bashkimi Evropian iu bashkuan të dielën përpjekjeve për të gjetur personat e zhdukur nga përmbytjet katastrofike dhe rrëshqitjet e dheut, si edhe për pastrimin e mbetjeve që moti i pazakontë la pas. Bosnja ka kërkuar ndihmë nga Bashkimi evropian pasi reshjet e mëdha të shiut, të enjten dhe të premten, shkaktuan përmbytje dhe rrëshqitje dheu, që kanë lënë të vdekur të paktën 20 persona. Fatkeqësia natyrore po ashtu ka shkatërruar rrugë dhe ura dhe ka lënë të lënduar me dhjetëra persona të tjerë. Zyrtarët thanë se të paktën 10 persona ende konsiderohen të zhdukur, shumica nga fshati Donja Jabllanica, në jug të Bosnjës, fshat ku ka pasur rrëshqitje të mëdha dheu. Luigi Soreca, kreu i misionit të BE-së në Bosnje, shkroi në platformën X, se blloku evropian qëndron në krah të Bosnjes dhe se ekipet e shpëtimit po nxitojnë për të ndihmuar këtë vend. Autoritetet thanë se ekipet e shpëtimit nga Kroacia kanë mbërritur tashmë, ndërkaq një ekip nga Serbia pritet të shkojë në Bosnje më vonë gjatë ditës, pasuar nga një ekip shpëtimi i pajisur me qen të specializuar në kërkim shpëtim që do të dërgohet nga Sllovenia. Mali i Zi, Maqedonia e Veriu, Polonia, Republika Çeke dhe Turqia po ashtu kanë ofruar ndihmë, thanë autoritetet në Bosnje.