Irani prezantoi atë që zyrtarët e kanë cilësuar si raketa balistike hipersonike e parë që është prodhuar në vend, raportoi agjencia zyrtare e lajmeve IRNA, në një njoftim që me gjasë do të rrisë shqetësimet e perëndimit për kapacitetet raketore të Teheranit. Media shtetërore iraniane publikoi fotot e raketës të quajtur Fattah, ose Fitorja, në një ceremoni në të cilën merrte pjesë edhe presidenti Ebrahim Raisi dhe komandantët e gardës revolucionare të vendit. “Raketa hipersonike Fattah, ka një rreze veprimi prej 1400 km dhe është e aftë të shpojë cdo lloj mburoje mbrojtëse”, tha admirali Haxhizadeh, shefi i forcës ajrore të rojave revolucionare. Raketat hipersonike mund të fluturojnë me një shpejtësi të paktën pesë herë më të madhe se ajo e zërit dhe mund të ndjekin një trajektore komplekse, cka i bën të vështira të interceptohen. Vitin e kaluar, republika islamike tha tha se kishte ndërtuar një raketë balistike që mund të manovronte brenda dhe jashtë atmosferës.