Gjermania dhe Finlanda thonë se janë "thellësisht të shqetësuara" pasi një kabllo nënujore që lidhte vendet u këput. Këputja e kabllos së telekomunikacionit prej 1,170 km, e cila është duke u hetuar, vjen në një kohë të tensioneve të shtuara me Rusinë. Ministrat e Jashtëm të dy vendeve thanë në një deklaratë të përbashkët: "Siguria jonë evropiane nuk është vetëm nën kërcënim nga agresioni i Rusisë kundër Ukrainës, por edhe nga lufta hibride e aktorëve keqdashës". Dëmtimi i tubacioneve në Detin Baltik ka ngritur frikën e sabotimit vitet e fundit. Ndërkohë edhe një lidhje interneti 218 km e gjatë mes Lituanisë dhe ishullit Gotland të Suedisë u këput të dielën në mëngjes, tha një kompani suedeze e telekomunikacionit. Në tetor 2023, një tubacion gazi natyror mes Finlandës dhe Estonisë u dëmtua rëndë. Zyrtarët finlandezë më vonë thanë se incidenti ishte shkaktuar nga një anije kineze me kontejnerë që tërhiqte spirancën e saj. Dhe prokurorët gjermanë janë ende duke hetuar shpërthimin e tubacioneve të gazit Nord Stream midis Rusisë dhe Gjermanisë në vitin 2022. Ka pasur teori konspirative rreth atij sulmi, me versione të pakonfirmuara se qeveria ukrainase, ruse ose amerikane qëndron pas tij. Incidenti i fundit përfshin një kabllo fibre optike C-Lion1 që lidh kryeqytetin finlandez, Helsinki dhe qytetin gjerman të Rostockut, i cili u këput rreth orës 02:00 të së hënës.