Këshilltari për Çështjet e Emergjencave Civile në presidencë, Shemsi Prençi, ka dhënë dorëheqjen nga kjo detyrë. Lajmin e ka bërë me dije presidenti Ilir Meta me anë të një postimi në rrjete sociale, duke motivuar dorëheqjen e Prencit, me angazhime të reja në të ardhmen. Sakaq, nga burimet mësojmë se vendimi I Prencit vjen pasi ai do të kandidojë në zgjedhjet parlamentare të 25 prillit nën siglën e LSI në zonën e Durrësit. Shemsi Prençi ka mbajtur edhe postin e kreut të emergjencave civile, por u shkarkua nga ministrja e Mbrojtjes Olta Xhaçka, për t'u zëvendësuar nga Haki Çako. E pas kësaj ai u emëruar pranë presidencës, kur deri sot mbajti postin Këshilltari për Çështjet e Emergjencave Civile. Kujtojmë se më parë nga presidenca është larguar edhe Bahri Shaqiri, i cili kryente detyrën e Këshilltarit për Sigurinë në Presidencë. Edhe Shaqiri është një ndër emrat e piketuar nga LSI për kandidat për deputet në Durrës.