“Bashkia Himarë nuk ka më kohë për të humbur”. Me këto fjalë nis reagimin e parë publik Petro Gjikuria, kandidati i dalë nga opozita për kryetar të Bashkisë së Himarës. Ai thotë se prej 12 vitesh Bashkia nuk pati forcën të planifikojë dhe materializojë ato çka nevojiten për banorët e saj, teksa premton që do të jetë një kryebashkiak i të gjithëve. Ndërkohë, për të siguruar votën e mbështetësve të Belerit, Gjikuria shkruan se akuzat ndaj tij janë të fabrikuara. GJIKURIA - Kam lindur në Dhërmi dhe vij nga një familje që ka luftuar për dy gjëra të shenjta: për Vendin dhe për Demokracinë. Kam punuar fort në Greqi dhe në SHBA dhe kam mësuar shumë duke punuar në fushën e kulinarisë dhe hotelerisë, por edhe në organizata të ndryshme të diasporës dhe të gjitha këto dije dhe eksperienca dëshiroj t’i vendos në funksion të vendit tim, duke punuar së bashku me bashkëqytetarët e mi për mirëqenien dhe zhvillimin e Himarës në të gjitha fushat. Ai thotë më tej se e nesërmja në Bashkinë Himarë nuk do të ketë përjashtime, nuk do të ketë fëmijë të nënës dhe njerkës, banorë të përhershëm dhe të përkohshëm, socialistë dhe demokratë, tanët dhe të atyre. Kandidati opozitar thotë gjithashtu se si kryebashkiak do t’i ketë portat e hapura në Tiranë, Bruksel, Athinë, por edhe në Uashington.