Ambasada amerikane në Tiranë i ka uruar fat të mbarë kandidatëve që u kualifikuan në procesin e verifikimit të kushteve të sigurisë për “Hetues” në Byronë Kombëtare të Hetimit. “Shtetet e Bashkuara të Amerikës do të vazhdojnë të mbështesin SPAK-un dhe ata që i përgjigjen thirrjes së detyrës për të luftuar korrupsionin dhe krimin e organizuar në emër të popullit shqiptar”, theksohet në reagim. “Presim së shpejti një thirrje tjetër për hetues të BKH-së, për të forcuar më tej këtë institucion të ri!”, shkruan në postimin e saj ambasada amerikane. Kujtojmë që në 1 prill, Komisioni i Posaçëm i Verifikimit të Pasurisë dhe Figurës mbylli verifikimin e kushteve të sigurisë për kandidatët që konkurrojnë për “Hetues” në Byronë Kombëtare të Hetimit dhe ka vendosur që nga 37 kandidatë, 28 (njëzet e tetë) kandidatë kalojnë kushtet e sigurisë, 9 (nëntë) kandidatë nuk i kalojnë kushtet e sigurisë.